Agjenti i Florian Wirtz, Volker Struth, ka zbuluar se kishte tentuar të siguronte një transferim të klientit të tij te Real Madridi verën e kaluar, para se mesfushori gjerman të transferohej te Liverpooli në një marrëveshje rekord prej 116 milionë funtesh nga Bayer Leverkusen.

Transferimi i Wirtz ishte ndër më të mëdhenjtë në historinë e klubit anglez, edhe pse më vonë u tejkalua nga marrëveshja prej 125 milionë funtesh që Liverpooli pagoi për Alexander Isak.

Pavarësisht kësaj, 22-vjeçari konsiderohet si një nga projektet kryesore mbi të cilin klubi synon të ndërtojë skuadrën për vitet e ardhshme.

Megjithatë, karriera e Wirtz mund të kishte marrë një drejtim krejtësisht tjetër. Sipas Struth, ekzistonte një mundësi reale që lojtari të bashkohej me Real Madridin dhe të ribashkohej me ish-trajnerin e tij te Leverkuseni, Xabi Alonso, i cili në atë kohë drejtonte klubin madrilen.

“Gjatë periudhës kur po diskutohej transferimi te Liverpooli ose Bayern Munichu, unë e telefonova Xabi Alonson dhe i thashë: ‘Duhet ta marrësh këtë djalë nga Leverkuseni me vete te Real Madridi’,” tha Struth për Bild.

Ai shtoi se Alonso i ishte përgjigjur: “Nuk ke pse ma thua mua këtë, duhet t’ia thuash Florentino Perezit.”

Struth zbuloi se më pas i kishte dërguar një mesazh presidentit të Real Madridit: “I dashur Florentino, ta kam thënë shumë herë: kam një lojtar këtu që e rekomandoj fuqishëm. Florian Wirtz e bën çdo skuadër në botë më të mirë.”

Presidenti i Real Madridit, Florentino Perez, e falënderoi për ofertën dhe e referoi te drejtori i përgjithshëm Jose Angel Sanchez për të vazhduar diskutimet. Megjithatë, për shkak të një vere të ngarkuar me transferime dhe kufizimeve buxhetore, klubi spanjoll vendosi të mos vazhdonte më tej me këtë lëvizje.

“Atë vit nuk ishte momenti i duhur për shkak të përbërjes së skuadrës dhe buxhetit. Edhe arkat e Real Madridit nuk janë gjithmonë të mbushura. Por dëshira ime mbetet që Florian të luajë një ditë atje,” deklaroi Struth.

Kjo deklaratë mund të shqetësojë tifozët e Liverpoolit, pasi Wirtz ka filluar të përshtatet gradualisht në “Anfield” pas një fillimi jo të lehtë. Megjithatë, mbetet për t’u parë nëse Real Madridi do të rikthehet në të ardhmen për të tentuar transferimin e njërit prej talenteve më të mëdhenj të futbollit evropian./Arbresh.info