Tregtia në rrugë e dëmshme, Bashkia Shkodër propozon rrugë alternative për tregtarët e Zdrales

17:35 | 4 Maj 2020

Tregtia në rrugë mbetet një problematikë shumë e madhe sidomos në këtë situatë të krijuar nga COVID-19.

Kushtet janë të papranueshme për shëndetin e qytetarëve por edhe vetë tregtarëve.

Bashkia Shkodër ka biseduar disa herë me tregtarët e Zdrales për të gjetur një rrugë alternative për të siguruar aktivitetin e tyre pa rrezikuar shëndetin e qytetarëve.

Kërkohen kushte rigoroze higjienike, jo vetëm në hapësira publike, por edhe në dyqane. Kësisoj tregtimi në rrugë nuk lejohet.

Ndërkohë është shumë e domosdoshme që në Shkodër, aq më shumë në kushtet e vështirësive ekonomike, të gjendet një mundësi e lehtësi për t’i ofruar fermerëve e tregëtarëve për të punuar e jetuar.

Të ndodhur në këto kushte, për 88 tregtarët e Zdrales, prej të cilëve rreth 10 janë të regjistruar dhe kane paguar detyrimet, sipas legjislacionit në fuqi, ka vijuar puna për gjetjen e një zgjidhjeje më të qëndrueshme.

Po komunikohet me palë të treta, për vënien në dispozicion të hapësirave të përshtatshme për tregtim dhe krijimin e kushteve të nevojshme, me sinjalistikën e nevojshme horizontale dhe vertikale, kushtet higjienike, për shitjen ditore të produkteve bujqësore të fermerëve.

Në këtë linjë, po punohet për të siguruar hapësirën për të gjithë duke mundësuar fillimin e vendosjes sa me shpejt të tezgave në vendet e tregtimit për fermerët, në hapësiren e lejueshme për ushtrim aktiviteti tregetar.

Gjatë ditës së sotme shitësit ambulantë zhvilluan një protestë përpara Bashkisë së Shkodrës, pasi prej 3 javësh tregu ambulant është i mbyllur./OraNews

 

Shpërndaje në rrjete sociale

Lajmet më të lexuara