Një aksident është regjistruar në orët e mbrëmjes së sotme në afërsi të “Ujit të ftohtë” në Tepelenë.

Një makinë tip Benz i cili udhëtonte me shpejtësi të lartë ka dalë nga rruga dhe si rezultat i përplasjes, kanë mbetur të dëmtuar drejtuesi i mjetit dhe 3 pasagjerë.

Sipas policisë, ky mjet fillimisht është konstatuar në aksin rrugor Kakavijë-Gjirokastër ku policia i bëri shenjë të ndalonte.

Dyshohet se brenda mjetit udhëtonin emigrantë të paligjshëm. Drejtuesi i mjetit, 20-vjeçari me iniciale A.K. nuk i është bindur policisë për të ndaluar e për pasojë është larguar me shpejtësi.

Më pas, për shkak të shpejtësisë ai është aksidentuar në afërsi të “Ujit të ftohtë”. Brenda makinës ishin 3 emigrantë të paligjshëm që dyshohet se 20-vjeçari po i transportonte, me qëllim kalimin e tyre drejt vendeve të BE-së.

Njoftimi i policisë:

Rreth orës 19:20, në aksin rrugor Kakavije-Gjirokastër, në afërsi të lagjes “Kordhoc”, shërbimet e policisë kanë konstatuar automjetin tip “Benz”, që drejtohej nga shtetasi A. K., 20 vjeç, banues në Tiranë, i cili dyshohej se transportonte emigrantë të paligjshëm. Shërbimet e policisë i kanë bërë shenjë për të ndaluar por drejtuesi i mjetit nuk i është bindur urdhërit të punonjësit të policisë duke shtuar shpejtësin e mjetit.

Për pasojë në vendin e quajtur “Uji i ftohtë”, Tepelenë mjeti tip “Benz” ka dalë nga rruga dhe si rezultat kanë mbetur të dëmtuar drejtuesi i mjetit dhe 3 emigrantë të paligjshëm që ndodheshin në mjet, të cilët janë transportuar për në Spitalin Rajonal Gjirokastër, pa probleme për jetën.