Shqipëria është pranuar si Vëzhguese në Rrjetin Evropian të Administratës Publike (EUPAN), gjatë takimit të zhvilluar në Budapest, Hungari.

Lajmin e bëri të ditur sot ministrja e Shtetit për Administratën Publike dhe Antikorrupsionin, Adea Pirdeni, e cila vlerësoi se ky hap e afron administratën shqiptare me administratat e vendeve anëtare të Bashkimit Evropian.

Pirdeni theksoi se kjo do të shpejtojë akoma më shumë ritmin e anëtarësimit të Shqipërisë në BE.

“Në Rrjetin Evropian të Administratës Publike, ku Shqipëria sapo u pranua zyrtarisht si Vëzhguese, për të afruar edhe më tej administratën tonë me administratat e vendeve anëtare të Bashkimit Evropian, si dhe për të shpejtuar akoma më shumë ritmin e anëtarësimit të Shqipërisë në BE”, u shpreh ministrja Pirdeni.

Pirdeni ndodhet në Budapest ku ditën e djeshme nënshkroi me ministrin e Punëve të Jashtme dhe Tregtisë së Hungarisë, Péter Szijjártó, Planin e Veprimit për trajnimin e nëpunësve të institucioneve shqiptare në procesin e anëtarësimit në Bashkimin Evropian.

Kjo vizitë mbahet në javët e fundit të Presidencës Hungareze të Këshillit të Bashkimit Evropian, e cila, pas hapjes së negociatave për grup-kapitullin I “Themeloret” në tetor, vetëm pak ditë më parë njoftoi dritën e gjelbër për hapjen e negociatave edhe për grup-kapitullin VI, që ka në fokus Marrëdhëniet e Jashtme./rtsh.al