Mine Hasani, një mësuese e shkollës 9-vjeçare “100 vjetori i Pavarësisë” në Kamëz, është shpallur në kërkim nga policia.

Në një video të publikuar në media, 58-vjeçarja shfaqet duke fyer dhe goditur nxënës të ciklit fillor ku jepte mësim.

Pamjet të transmetuara në media tregojnë se si mësuesja godet fizikisht fëmijët në klasë dhe përdor një fjalor me terma degradues dhe kërcënues.

Shprehjet që ajo përdor rregullisht ndaj nxënësve variojnë nga “idiotë”, “kafshë”, te “zhulsa” e “kokë palarë”.

Sipas policisë, ndaj saj rëndojnë dyshime për dhunë gjatë procesit mësimor, ndërsa hetimet janë mbështetur si në pamjet filmike, ashtu edhe në veprime të tjera hetimore.

Nëpërmjet një njoftimi zyrtar, policia thekson se 58 vjeçarja ka ushtruar dhunë fizike dhe psikologjike ndaj nxënësve të klasës së katërt në shkollën “100 vjetori i Pavarësisë” dhe për pasojë, po punohet për kapjen e saj dhe zbardhjen e plotë të rastit.

Pas denoncimit, ministrja e Arsimit, Mirela Kumbaro, njoftoi se mësuesja e shkollës 9-vjeçare “100 vjetori i Pavarësisë” u hoq nga puna.

“Një mesazh për të gjithë prindërit dhe mësuesit, mbi rastin flagrant të dhunës së ushtruar nga një person që mbante xhaketën e mësuesit, si një sjellje e papranueshme dhe në kundërshtim të plotë me vlerat e arsimit. Nga sot, personi nuk është më pjesë e trupës së mësuesve, ndërsa grupi i punës i ngritur për këtë çështje po vijon dokumentimin e plotë të përgjegjësive. Asnjë ngjarje e tillë nuk mund dhe nuk duhet të cenojë punën me përkushtim, me profesionalizëm dhe me pasion të mijëra mësuesve në të gjithë Shqipërinë, të cilët çdo ditë janë modeli më i mirë për fëmijët tanë. Respekt dhe mbështetje për ta”, shkroi Kumbaro në Facebook.