Kryeministri Edi Rama përmes një postimi në “Facebook” ka ndarë pamje nga samiti “Në Mbrojtje të Demokracisë” i cili zhvillohet këtë të shtunë në Spanjë. Nga pamjet e publikuara, Rama shihet në samit teksa pritet nga homologu i tij spanjoll, Pedro Sanchez.

Pas pritjes, liderët botërorë që marrin pjesë në samit shkrepën edhe një foto. Në fokus të samitit janë sfidat që lidhen me funksionimin e institucioneve demokratike, rolin e multilaterizmit, si dhe ndikimi i teknologjisë dhe dezinformimit në shoqëritë moderne.

Diskutimet pritet të adresojnë nevojën për rregullim më të fortë të hapësirës digjitale dhe forcimin e demokracive përmes bashkëpunimit ndërkombëtar dhe reduktimit të pabarazive.

Gjatë qëndrimit në Barcelonë, Rama do të zhvillojë takime edhe me Presidentin e Këshillit Evropian, Antonio Costa, përveç takimit me homologun spanjoll.

Vizita në Spanjë vjen pas ndalesës në Itali, ku kreu i qeverisë shqiptare u takua me kryeministren Giorgia Meloni. Në atë takim u diskutua për thellimin e bashkëpunimit në fusha strategjike si mbrojtja, ndërlidhja dhe menaxhimi i emigracionit.