Mbi 1 milion euro transaksione të paligjshme, arrestohet turku në Tiranë

11:18 | 14 Janar 2025
E.H

Policia e Tiranës ka finalizuar një operacion për goditjen e krimeve kibernetike, duke vënë në pranga shtetasin turk Ferhat Karakus.

41-vjeçari akuzohet se duke përdorur poset e biznesit të tij, kishte kryer transaksione të kundërligjshme, me anë të një karte të një shtetasi tjetër, i cili në momentin e kryerjes së transaksionit nuk ndodhej në Shqipëri.

“Arrestohet shtetasi turk F. K., 41 vjeç, i cili në bashkëpunim me shtetas të tjerë, me anë të mashtrimit kompjuterik, kishte kryer transaksione të kundërligjshme, me vlerë mbi 1 milion euro. Këto transaksione janë raportuar si veprime mashtrimi dhe nga kompania ‘MasterCard’”, informon policia.

Uniformat Blu sqarojnë se në bashkëpunim me agjencitë ligjzbatuese homologe, po punohet për zbardhjen e rrethanave të rastit dhe identifikimin e shtetasve të tjerë të dyshuar të implikuar në këtë veprimtari të paligjshme./A2cnn