Kushdo që sjell ndërmend zonën e zhurmshme të “Rrugës së Durrësit” në kryeqytet, me jetën që gëlonte, makinat dhe trafikun e pashoq, këto pamje të realizuara paraditen e sotme do t’i duken thuajse surreale.

Pas urdhrit të ri të qarkullimit, Tirana (dhe jo vetëm) ka ndaluar e tëra duke parkuar kështu automjetet dhe ndaluar çdo lëvizje.

E gjithë Shqipëria gjendet në izolim total, nga dita e djeshme (e shtunë ora 13:00), për të vazhduar sot gjatë gjithë ditës deri në 05:00 të mëngjesit të datës 23.

Askush nuk lejohet të dalë nga shtëpia. Gjithçka është mbyllur, duke filluar nga supermarketet, farmaci e çdo biznes tjetër.

Të vetmit në punë këtë të dielë, janë forcat e policisë dhe të ushtrisë në terren për të garantuar se askush nuk thyen shtetrrethimin, pjesëtarët e mediave dhe stafi mjekësor.

Shqipëria deri më tani ka 76 të prekur, prej të cilëve 2 viktima. Ndërkohë, nga ora 05:00 e mëngjesit të së hënës do të vihet sërish në fuqi orari i lejimit të qarkullimit të këmbësorëve deri në orën 13:00, që siç tha kryeministri Edi Rama do të vazhdojë gjatë gjithë javës që vjen.