Vetëm në një prej pularive në Xhafzotaj të Durrësit, kanë ngordhur rreth 120 mijë pula. Përfaqësues të kompanisë po largojnë nga mjediset shpendët e ngordhura si pasojë e gripit H5N8.

Administratori i saj, Artan Luku, thotë se pritet të asgësohen edhe shpendët e tjera që janë gjallë dhe mund të jenë prekur nga virusi.

“Pritet që në mënyrë immediate Ministria e Bujqësisë dhe autoritetet përkatëse të japin urdhra për eleminimin e atyre krerëve që janë gjallë. Ne po i marrim krerët e gjallë sepse nuk kemi si i menaxhojmë. Nëse do t’i hiqnim spinën, nuk kemi si i menaxhojmë. Tani më të rrezikshëm janë krerët e gjallë se sa ato që kanë ngordhur. Vetë procesi biologjik është i tillë që rrezikshmëria është më e lartë te krerët e gjallë që sëmundja mund të përhapet”.

Për të mbrojtur konsumatorët, kompania ka tërhequr edhe produktet nga tregu.

“Për produktet e vezës që del nga Xhafzotaj, e ka tërhequr edhe atë që ka shpërndarë gjatë këtyre ditëve, sot do ia dorëzojmë AKU-së. Aktualisht, ne tregtjmë vezë vetëm nga kompleksi që kemi në zonën e Vlorës”.

Ndërkohë prokuroria e Durrësit ka nisur hetimet për ngordhjen e shpendëve në disa pulari të qytetit bregdetar. Organi kërkon informacion se kur është konstatuar rasti i parë i virusit dhe a janë vënë në dijeni institucionet përkatëse menjëherë pas kësaj situate./KlanNews/