Një pallat është përfshirë nga flakët pasditen e kësaj të marte në Tiranë, përballë spitalit “Nënë Tereza”.

Flakët përpinë të gjithë pallatin duke e djegur brenda pak minutash, ndërsa banorët nxituan të evakuoheshin.

Nga zjarri janë asfiksuar 7 persona, mes tyre dy zjarrfikës.

Ndërkohë raportohet për dëme të konsiderueshme materiale.

Në ndihmë të zjarrfikësve janë edhe 2 helikopterë Cougar. Në vendin e ngjarjes ndodhet edhe ministri i Brendshëm, Besfort Lamallari.

Shkëlqim Goxhaj, drejtor i zjarrfikësve të Tiranës dha një deklaratë për mediat, ku tregoi shkakun e nisjes së zjarrit në pallatin 12-katësh pranë spitalit “Nënë Tereza”.

Ai u shpreh se zjarri nisi në një biznes në katin e parë të pallatit dhe fasada ndikoi në përhapjen e flakëve.

Ministria e Mbrojtjes ka bërë të ditur se situata po ndiqet nga afër dhe janë angazhuar forca të shumta në terren./Tch