Rruga Qafë Thore-Theth është bllokuar plotësisht si pasojë e rënies së ortekëve në zonën pranë tuneleve panoramike.

Lajmin e bëri të ditur sot prefektja e Qarkut Shkodër, Holta Duda e cila njoftoi se zona paraqet rrezik të lartë për kalim.

Sipas prefektes Duda për arsye sigurie, qarkullimi do të qëndrojë i mbyllur për të gjitha automjetet, përfshirë edhe mjetet borëpastruese.

“Bazuar në analizën e riskut dhe pas komunikimit me inxhinierët e firmës kontraktore për mirëmbajtjen e rrugës, dhe ARrSh-në, në segmentin rrugor ‘Qafë Thore – Theth’, për shkak të rrezikut nga ortekët e dëborës si pasojë e kushteve të përkeqësuara atmosferike, nuk do të lejohet qarkullimi i automjeteve, pasi rrezikshmëria është e lartë”, thuhet në njoftim.

Duda u bëri thirrje drejtuesve të mjeteve të respektojnë sinjalistikën, të shmangin këtë aks dhe të ndjekin njoftimet zyrtare për përditësime të mëtejshme.

Ndërkohë Policia Rrugore njofton se ky segment rrugor do të mbahet i bllokuar deri në një moment të dytë.