Çmimet e importit në tremujorin e katërt të vitit që lamë pas, krahasuar me të njëjtën periudhë të vitit 2015 ranë 0.1 %, por ato ishin 0.6 % më të larta krahasuar me tremujorin paraardhës.

Sipas raportit të Institutit të Statistikave, INSTAT, Indeksi i Çmimeve të Importit u ul me 0,1 % në krahasim me tremujorin e katërt 2015 dhe u rrit me 0,6 % në krahasim me tremujorin e tretë 2016.

Krahasuar me tremujorin e katërt të vitit 2015, Indeksi i Çmimeve të Importit në industrinë nxjerrëse ka shënuar ulje me 3,4 %, ndërsa në industrinë përpunuese, ka shënuar rritje me 0,2 %.

Në tremujorin e katërt 2016 ndryshimi tremujor i indeksit është 0,1 %. Çmimet e Importit në industrinë nxjerrëse shënuan ulje me 0,1 % krahasuar me tremujorin e mëparshëm. Në këtë seksion vlen të përmendet ulja e çmimeve të importit të produkteve në aktivitetin “nxjerrja e qymyrit dhe linjiteve” me 0,5 %.

Ndërsa çmimet e importit në industrinë përpunuese shënuan rritje me 0,5 %, krahasuar me tremujorin e tretë 2016, ku ndikimin me të madh e shënuan aktivitetet “metalurgjia” me 3,5 % dhe “shtypshkrimi dhe rigrupimi i mediave të regjistruara” me 2,9 %.