Google ADS

BERZH bën gati 62.9 milionë euro për linjën hekurudhore Shqipëri-Mali i Zi

10:26 | 9 Gusht 2022

Banka Evropiane për Rindërtim dhe Zhvillim (BERZH) ka bërë të ditur sot se po planifikon të japë një kredi sovrane deri në 62.9 milionë euro për rehabilitimin e linjës hekurudhore midis Vorës në Shqipëri dhe Hanit të Hotit në kufirin me Malin e Zi.

Financimin do ta përfitojë Hekurudha Shqiptare, operatori i sistemit hekurudhor shqiptar, i cili është në pronësi të plotë të shtetit, raporton Telegrafi Shqipëri.

Projekti i linjës hekurudhore prej 120 kilometrash, me një kosto të përgjithshme prej rreth 267 million euro, parashikohet të bashkë-financohet nga BERZH, Banka Evropiane e Investimeve (EIB) dhe Bashkimi Evropian (BE) përmes Kornizës së Investimeve të Ballkanit Perëndimor (WBIF).

Sipas BERZH-it, objektivat e projektit janë promovimi i lidhjes së Shqipërisë dhe zhvillimit të saj ekonomik dhe integrimit rajonal pasi linja është pjesë e Rrjetit Kryesor të Ballkanit Perëndimor dhe një zgjatim i Rrjeteve të Transportit Trans-Evropian (TEN-T) në rajon.

Projekti gjithashtu ka për qëllim të mbështes zhvillimin e një transporti më të gjelbër dhe më të qëndrueshëm duke promovuar kalimin e modalitetit nga rruga në hekurudhë në Shqipëri.

Projekti vjen në një periudhë kur qeveria e Shqipërisë ka nënshkruar një marrëveshje me qeverinë e Kosovës për ndërtimin e një hekurudhe të re që do të lidhë Durrësin me Prishtinën.

Këto projekte janë në linjë me direktivat e BE-së për zhvillimin e transportit hekurudhor në rajon.

Projekte të tilla shikohen si zhvillues të ekonomisë dhe si një mënyrë e mirë për të ulur ndotjen.