Gjeneralmajore Lisa Hou, komandante në Gardën Kombëtare të Nju-Xhersit, vizitoi Shqipërinë javën e kaluar për të uruar Forcat e Armatosura Shqiptare për hapjen e Bazës Ajrore të Kuçovës dhe 15-vjetorin e anëtarësimit në NATO, njoftoi sot ambasada e SHBA, në Tiranë.

Gjatë vizitës së saj, gjeneralmajorja Hou u takua me gjeneralmajor Arben Kingjin, shef i Shtabit të Forcave të Armatosura të Shqipërisë dhe gjeneral brigade Bardhyl Nuredinaj, komandant i Akademisë së Forcave të Armatosura.

Ajo u takua edhe me presidentin Bajram Begaj, me të cilin ka punuar edhe më herët kur ishte shef i shtabit.

Temat e diskutimit përfshinin aktivitetet e ardhshme të Programit të Partneritetit Shtetëror me Gardën Kombëtare të Nju-Xhersit, të tilla si kandidatët për oficerë të Gardës Kombëtare që vijnë për t’u trajnuar me oficerët kadetë shqiptarë muajin e ardhshëm, mbështetja e Gardës Kombëtare të Nju-Xhersit për programin e helikopterëve UH-60 Blackhawk, shtimin e aktivitetet të zhvillimit profesional, konferencën e ardhshme të Kartës së Adriatikut të Shefave të Shtabit (A-5) të organizuar nga Shqipëria, si dhe stërvitjen ushtarake Defender 25 vitin të ardhshëm./atsh