Deputeti i Partisë Socialiste, Pirro Vengu reagoi sot në mbështetje të studentëve shqiptarë në Maqedoninë e Veriut, duke vlerësuar protestën e tyre për mbrojtjen e përdorimit të gjuhës shqipe në provimet profesionale, si një shembull qytetar dhe europian në mbrojtje të të drejtave themelore.

Përmes një postimi në rrjetet sociale, Vengu u shpreh se studentët shqiptarë “e treguan sërish se gjuha nuk lyp leje”, ndërsa theksoi se kësaj here ata ishin më të shumtë, më energjikë dhe me mbështetjen e studentëve nga Tirana dhe nga gjithë shqiptaria.

Sipas deputetit socialist, edhe përballë pengesave burokratike, energjia e një kauze të drejtë arrin gjithmonë të gjejë rrugën e saj. Ai nënvizoi se protestat paqësore dhe qytetare mund të shndërrohen në zërin e një të drejte themelore.

“Edhe kur dikush mendon se mund të ndalojë studentët me pengesa burokratike, energjia e një kauze të drejtë gjen gjithmonë rrugën e saj. Një shembull europian në zemër të Shkupit se si protesta paqësore dhe qytetare mund të kthehet në zërin e një të drejte themelore, larg tensioneve që nuk kanë vend në fqinjësinë e mirë ku synojmë të jetojmë bashkë”, shkruan Vengu./atsh.al