Partia politike “E majta” nëpërmjet një kumtese shprehin revoltën e tyre ndaj procesit të miratimit të ndryshimeve kushtetuese. Nga kjo parti kërkojnë shpërbërjen e Kuvendit dhe shkuarjen në zgjedhje të parakohshme kuvendare së bashku me ato për kryetar shteti që do të mbahen në muajin maj të këtij viti.

“Nëse mendoni se keni mbështetjen e qytetarëve për dhunimin e demokracisë, për dhunimin e shtetit të së drejtës, për qeverisjen e korruptuar, caktoni zgjedhje të parakohshme kuvendare”, kumtojnë nga kjo parti, njofton Telegrafi Maqedoni.

Sipas kësaj partie, ndryshimet kushtetuese janë votuar me koordinim mes partive nga qeveria dhe OBRM-PDUKM-së.

Ata shtojnë se pasiviteti i OBRM-PDUKM-së është një dëshmi shtesë se ndryshimet kushtetuese u votuan me bashkëpunim mes qeverisë dhe partisë më të madhe opozitare ndërsa qytetarët nuk kanë përfaqësues në Kuvend për të kundërshtuar shkeljen e demokracisë, shtetit të së drejtës dhe shkeljen e të drejtës për vetëvendosje.

“E majta” përsëriti qëndrimin se pyetje në referendum ka qenë manipulative dhe se janë mbushur kutitë e votimit./Telegrafi/