Kryetari i Lëvizjes Vetëvendosje, Visar Ymeri, ka qortuar pjesëtarët e partisë së tij, për sjelljet e tyre pas zbulimit në media të përçarjes së VV’së.

Në intervistën e parë pas shpërthimit të një skandali të brendshëm në partinë e tij, Ymeri ka dënuar reagimet e anëtarëve dhe aktivistëve të VV’së në rrjetet sociale.

“Ajo çfarë ka ndodhur në rrjetet sociale gjatë kësaj periudhe është e papranueshme, ashtu si ofendimi i Aida Dërgutit ndaj Albin Kurtit”, ka thënë Ymeri në “Rubikon” të KTV’së, kur është pyetur për qëndrimin e shprehur nga Xhelal Sveçla dhe anëtarët e VV’së në Tiranë.

“Në asnjë mënyrë nuk mund t’i pranoj insinuatat që i vishen zonjës Dërguti”, është shprehur ai.

“Është e papranueshme mënyra se si po shprehemi në publik, kushdo qoftë që e bën atë. Kështu nuk po i ndihmojmë zgjidhjes së problemit, po i shtojmë benzinë flakës”, ka thënë Ymeri.