Një person nga Malisheva ka ndërruar jetë në QKUK pasi kishte pësuar lëndime të rënda në vendin e tij të punës në fshatin Dragobil.

Lajmin për Arbresh.info e ka konfirmuar Sheremet Elezaj, zëdhënës i policisë për rajonin e Gjakovës.

Elezaj tha se viktima kishte pësuar lëndime me datën 07.04.2025.

Trupi i pajetë i viktimës është dërguar për ekzaminim mjeko-ligjor.

“Më datë 07.04.2025, në Stacionin Policor në Malishevë është iniciuar rasti “Asgjësim, dëmtim ose heqje e pajisjeve mbrojtëse dhe rrezikimi i sigurisë në vendin e punës”, pasi që rreth orës 16:40 viktima, mashkull i moshës madhore, ishte dërguar në QKMF në Malishevë me lëndime të rënda trupore, të cilat dyshohet se janë shkaktuar në vendin e tij të punës, në fshatin Dragobil. I njëjti më pas ishte dërguar në QKUK në Prishtinë, ku sot jemi njoftuar nga stafi mjekësor se ai ka ndërruar jetë. Me vendim të prokurorit të shtetit, trupi i pajetë i viktimës dërgohet për ekzaminim mjeko-ligjor”, tha Elezaj./Arbresh.info