Edhe pse Qeveria në largim ditë më parë nxjerri një vendim për ndalim të përdorimit të veturave zyrtare, një gjë e tillë nuk po respektohet.

Ndonëse fundjavë, në redaksinë e portalit arbresh.info sot kanë arritur disa fotografi, ku shihet një veturë zyrtare 3Z në magjistralen Deçan-Pejë.

Madje, lexuesit e portalit, janë ankuar se vozitja e kësaj veture ishte në shpejtësi të tejkaluar, duke rrezikuar kështu jetën e pjesëmarrësve në trafik.

Ndryshe, më 12 maj Qeveria në detyrë e Republikës së Kosovës në krye me Albin Kurtin ka marrë vendim për përdorimin e veturave të automjeteve të qeverisë.

Në këtë vendim thuhet se për të racionalizuar shpenzimet e parasë  publike nga përdorimi i automjeteve zyrtare, shfuqizohet vendimi i datës 22.01.2008 si dhe pezullohet Udhëzimi Administrativ për përdorimin e Automjeteve të Qeverisë, deri në nxjerrjen e Udhëzimit Administrativ përkatës nga Qeveria e Kosovës.

Sipas këtij vendimi, kryeministri, zv.kryeministrat, ministrat dhe zv.ministrat, Shefi i Stafit të Kryeministrit dhe Sekretari i Përgjithshëm Zyrës së Kryeministrit do të kenë në përdorim 24 orë në ditë veturat zyrtare, ndërsa zyrtarët e tjerë vetëm gjatë orarit të rregullt të punës. Në përjashtim të disa rasteve./arbresh.info