Presidenti i Kosovës, Hashim Thaçi ka thënë se iniciativa e tij për themelimin e ushtrisë së Kosovës nuk është e rastësishme e aspak e nxituar.

Thaçi këtë deklaratë e bëri gjatë konferencës  “Forca e Sigurisë së Kosovës – Perspektivat e së Ardhmes”, e organizuar nga Instituti Kërkimor për Çështje Evropiane dhe të Zhvillimit (RIDEA).

Presidenti Thaçi tha që kërkon që të bëhet përpjekja e fundit me komunitetet e sidomos me atë serb që të bindet që formimi i ushtrisë të bëhet përmes ndryshimeve kushtetuese, shkruan arbresh.info.

“Unë sot i kam dërguar një letër publike kryeparlamentarit Veseli përmes së cilës kam kërkuar që Projektligji për FSK-në të mos vihet në rend të ditës edhe për pak kohë derisa të bëjmë edhe përpjeket e fundit me komunitetin serb që të binden që transformim i FSK-së të bëhet përmes ndryshimeve kushtetuese”, u shpreh Thaçi.

Ai shtoi se partnerët ndërkombëtarë pajtohen që Kosova ta themeloj ushtrinë e saj mirëpo kërkojnë që kjo të bëhet përmes ndryshimeve kushtetuese./Arbresh.info.