Kryetari i Preshevës, Shqiprim Arifi ka reaguar për tensionet e ditëve të fundit në veri të Mitrovicës.

Përmes një video mesazhi Arifi e ka dënuar ashpër dhunën në veri të vendit, shkruan Arbresh.info.

Ai i ka bërë thirrje Qeverisë së Kosovës që me përkushtimin më të thellë të ruajë marrëdhëniet e ndërtuara me dekada me ndërkombëtarët.

“Është e rëndësishme dhe jetike që të kemi një Republikë të Kosovës e cila ka një sovranitet të shtrirë në gjithë territorin e saj, por kjo arrihet vetëm me sinkronizim dhe koordinim me aleatët dhe miqtë tanë ndërkombëtarë, sidomos me Shtetet e Bashkuara të Amerikës”, ka thënë Arifi.

Megjithëkëtë, Arifi ka thënë se nëse acarohen marrëdhëniet e Kosovës, ShBA-së dhe BE-së, interesi kombëtar shqiptar vihet në rrezik.

“Interesi kombëtar shqiptar vihet në rrezik nëse acarohet marrëdhëniet e Kosovës me ShBA-në dhe me BE-në.  Andaj ftojmë Qeverinë e Kosovës që me përkushtimin më të thellë të ruajë marrëdhëniet e ndërtuara me dekada me miqtë tanë ndërkombëtarë”, tha ai.

“Me Amerikë nuk ka lojë!”, ka thënë Arifi./Arbresh.info/