Deputeti i Partisë Demokratike të Kosovës (PDK), Abelard Tahiri, ka reaguar  ndaj gjyqtarit të Gjykatës Kushtetuese, Radomir Llaban, i cili ka qenë gjyqtar raportues në rastin ku Grupi Parlamentar i PDK-së kontestoi ligjshmërinë e një seance të Kuvendit.

Sipas Tahirit, në atë seancë u zgjodhën:

1. Guvernatori i Bankës Qendrore;

2. Anëtarët e Bordit të Zyrës së Rregullatorit për Energji (ZRRE);

3. Kryesuesi dhe një anëtar i Bordit të Agjencisë Kosovare të Privatizimit (AKP);

4. Kryesuesi dhe anëtarët e Bordit Drejtues të Fondit të Kursimeve Pensionale.

“Si gjyqtar raportues, Llaban e rrëzoi kërkesën e GP të PDK-së, duke legjitimuar kështu seancën ku Vetëvendosje zgjodhi drejtuesit e këtyre institucioneve. Atëher kur Vetëvendosje dëshiron të sistemojë jashtëligjshëm anëtarë të saj në borde e pozita kyçe, vendimet e Radomir Llabanit i respektojnë dhe i lavdërojnë”, ka shkruar Tahiri në Facebook.

Këto deklarata të tij vijnë pas deklarimeve të ministres në detyrë, Albulena Haxhiu e cila të dielën në një konferencë për media tha se gjyqtari serb Radomir Llaban është bashkëpunotr i BIA-s dhe ka raporte të ngushta me kryeterroristin Milan Radoiçiq.