Objekti i ri, paralele e ndarë e shkollës fillore “Mihail Grameno”, në Fushë Kosovë, ka mbetur në fazën fillestare.

Fillimin e punimeve e patën kundërshtuar banorët e lagjes “Dardania”, afër “Kompleksit 300”, me arsyetimin se objekti gjendet shumë pranë ndërtesave, raporton KTV.

Madje, Inspektorati i Ministrisë së Mjedisit pati urdhëruar ndërprerjen e punimeve, me arsyetimin se komuna nuk ka leje për ndërtim.

Por, kjo, sipas Ali Topallit, nuk është arsyeja që objekti nuk është përfunduar, pasi sipas tij, komuna e ka lejen përkatëse.

Ai thotë se po presin donacion për ta përfunduar objektin.

Ndërkohë, objekti i vjetër i shkollës “Mihail Grameno” çdo ditë e më shumë po mbipopullohet nga nxënësit.

Menaxhmenti po synon të rrisë numrin e paraleleve, pasi në të kundërtën në një klasë, numri i nxënësve mund të arrijë në 60.

Mësimdhënësve po u del telashe ta zhvillojnë procesin mësimor në këto kushte.

Nga komuna thonë se kanë bërë plan, që nxënësit e klasave 7, 8 dhe 9 të transferohen në një shkollë të afërt derisa të përfundojë objekti i ri.

Objekti i ri i shkollës, sipas planit, është 600 metra katrorë me gjithsej 17 klasë mësimi./KTV/