Prokuroria Themelore në Prishtinë, gjatë ditës së djeshme ka mbajtur konferencë për media, ku ka shpalosur detaje lidhur me rastin e grupit famëkeq “Albkings”.

Prokurorja e rastit, Erza Bajrami-Kastrati, bëri me dije se grupi është mbyllur përfundimisht.

Prokuroria Themelore në Prishtinë: Arrestohen shtatë persona të lidhur me rastin e grupit “Albkings”

Mirëpo sot, në disa media kanë qarkulluar lajmet se ky grup famëkeq është hapur përsëri.

Lidhur me këtë, ka reaguar Prokuroria Themelore në Prishtinë, ku ka demantuar lajmin se është hapur përsëri grupi “Albinkings”.

Prokuroria ka bërë apel të gjitha mjeteve informuese të kenë parasysh vërtetësinë e lajmit, pasi lajme të tilla të pavërteta cenojnë sigurinë juridike të qytetarëve tonë dhe kanë për qëllim ndikimi në imazhin e institucioneve të Republikës së Kosovës.

Reagimi i plotë:

Prokuroria Themelore në Prishtinë me qëllim të informimit të saktë të opinionit publik, demanton lajmin i cili është duke qarkulluar në portalet vendore se është hapur përsëri grupi “Albkings”, pra ky lajm iu bëjmë me dije se i njëjti është i bazuar  në grupin e mbyllur së fundmi nga organet e hetuesisë, për çka iu kemi njoftuar përmes konferencës së mbajtur gjatë ditës së djeshme.

Përmes këtij reagimi, Prokuroria Themelore në Prishtinë iu bën apel të gjitha mjeteve informuese të kenë parasysh vërtetësinë e lajmit para se të plasohet në opinionin publik, pasi lajme të tilla të pavërteta cenojnë sigurinë juridike të qytetarëve tonë dhe kanë për qëllim ndikimi në imazhin e institucioneve të Republikës së Kosovës.

Po ashtu, iu sigurojmë se në çdo kohë jemi në monitorim të kësaj çështjeje dhe në qoftë se ka tendencë të hapjes së këtij grupi apo çfarëdo grupi tjetër të ngjashëm, prokuroria në koordinim me policinë do t’i ndërmerre masat e nevojshme.