Policia e Kosovës ka dhënë detaje lidhur me arrestimin e një personi i cili dyshohet se ka kërcënuar institucionet e shtetit përmes emailit.

Sipas njoftimit, në cilësinë e provave materiale janë sekuestruar: një laptop, një tablet dhe një telefon të cilat dyshohet se janë përdorur për kryerjen e veprës penale, shkruan Arbresh.info.

“Hetuesit policorë nga Drejtoria për Hetimin e Krimeve Kibernetike, pas veprimeve hetimore disa mujore, në bashkërendim me Prokurorinë Themelore-Prishtinë, nën dyshimin se një i dyshuar është përfshirë në veprën penale ‘kanosje’, sot më 22.05.2025, ka zbatuar urdhëresën e gjykatës ku është zhvilluar kontrolli në një lokacion në Prishtinë. Gjatë kontrollit kanë asistuar edhe njësi tjera policore.”, thuhet në njoftimin e policisë.

“Dyshohet se personi i dyshuar, në mënyrë të vazhdueshme, përmes e-maileve ka dërguar mesazhe me përmbajtje kërcënuese në drejtim të institucioneve të Republikës së Kosovës si: Prokurorisë së Shtetit, Policisë së Kosovës, Universitetit të Prishtinës, si dhe në drejtim të zyrtarëve të këtyre institucioneve.”, thuhet tutje.

I dyshuari me vendim të prokurorit ndalohet për 48 orë./Arbresh.info/