Ai gjatë ditës së djeshme kishte deklaruar në televizionin publik se zgjidhja më e duhur për marrëveshjen mes Kosovës dhe Serbisë është bashkimi i Preshevës, Bujanocit dhe Medvegjës, me Kosovën.

Por, nënkryetari tjetër i LDK-së nuk ndan mendimin e njëjtë për këtë çështje

Nënkryetari i LDK-së, Agim Veliu tha se nuk ka njohuri për deklaratat e djeshme të presidentit Thaçi sepse nuk i ka përcjellë.

Ndërsa, për deklaratat e kryetarit të Gjilanit, Lutfi Haziri i cili njëherësh është edhe nënkryetar i LDK-së, tha se ato janë qëndrime personale të Hazirit dhe se nuk e përfaqësojnë partinë.

Siç thotë Veliu, ndryshimi i kufijve mund të sjellë ndikime të tjera në vend dhe rajon.

“Ai është qëndrim i zotit Haziri, nuk është qëndrim i Lidhjes Demokratike, jo që nuk ka dëshirë Lidhja Demokratike që të bashkohet Presheva por duhet me pas parasysh se prekja e kufijve dhe ndryshimi i tyre ka ndikime tjera. Dhe ne jemi për Kosovën me këta kufij, pa ndryshime të kufijve. Ashtu sikurse është shpallë me rezolutën dhe ashtu sikurse Gjykata Ndërkombëtare e Drejtësisë e ka vërtetuar atë fakt. Ai është qëndrim individual i Lutes që e respektoj qëndrimi e tij mirëpo nuk është qëndrim i Lidhjes Demokratike.”, tha Veliu.

Nënkryetari Veliu theksoi se qëndrimi i tij përkon me atë të partisë sepse siç deklaron ai, ndryshimi i kufijve mund të sjellë gjendje të jashtëzakonshme për rajonin.

“Personalisht mendoj ashtu sikurse e kemi diskutuar edhe në mbledhjen e kryesisë edhe kemi ardhur në përfundim se Lidhja Demokratike nuk e mbështet ndryshmin e kufijve. Në bazë të gjykimit tonë mund të ketë ndikime të jashtëzakonshme për regjionin”, përfundoi ai.