Ministri i Bujqësisë, Faton Peci, ka nënshkruar sot Udhëzimin Administrativ për implementimin e programit për pagesa direkte / subvencione 2025.

Me anë të një postimi në Facebook, ai ka thënë se kjo është një iniciativë e rëndësishme që synon zhvillimin e mëtejshëm të sektorit të bujqësisë në Kosovë, shkruan Arbresh.info.

Ky program do të mundësojë mbështetje për mbi 30,000 fermerë, duke kontribuar në rritjen e kapaciteteve dhe përmirësimin e kushteve të punës për ata që operojnë në bujqësi.

“Sot nënshkrova Udhëzimin Administrativ për implementimin e Programit për Pagesa Direkte / Subvencione 2025 , program ky i cili do mundësojë zhvillimin e mëtutjeshëm të sektorit të bujqësisë dhe ngritjes së kapaciteteve të mbi 30,000 fermerëve”, ka shkruar Peci.

Pas nënshkrimit të udhëzimit, do të fillojë periudha 7-ditore për publikimin e tij në Gazetën Zyrtare, pas së cilës do të jepen detaje të tjera për hapjen e programit dhe mundësitë e aplikimit.

“U priftë e mbara!”, u shpreh ministri pas nënshkrimit të udhëzimit./Arbresh.info/