Kryetari i Partisë Demokratike të Kosovës, Memli Krasniqi, ka njoftuar se Leonora Morina-Bunjaku është kandidate e PDK-së për kryetare të Gjilanit.

Krasniqi, ka shkruar se Morina-Bunjaku është profesoreshë e aktiviste politike.

“Një profesoreshë e aktiviste politike, që ka ecur gjatë e ndershmërisht me Partinë Demokratike të Kosovës, Leonora Morina Bunjaku, është kandidate e jona për të udhëhequr me Komunën e Gjilanit. Ajo ka dëshmuar vullnet e forcë për të marrë përgjegjësi dhe i ka kryer ato ashtu si duhet”, ka deklaruar Krasniqi.

Kreu i PDK-së, shton tutje se “qytetarët e Gjilanit kanë nevojë për ndryshime”.

“Kanë nevojë për një qeverisje me transparencë, me projekte madhore e kreative, për më shumë vende pune, më shumë perspektivë për të rinjtë. Dhe, Leonora me ekipin e saj është lista e duhur për këtë. Ajo ka mbështetjen tonë të parezervë, të të rinjve e të rejave për t’i dhënë një frymë të re e prioritet qeverisjes në Gjilan”, ka deklaruar Krasniqi.

PDK ka zyrtarizuar edhe kandidatët tjerë për komuna, për zgjedhjet e 17 tetorit./arbresh.info/