Organizata e Veteranëve të Luftës së UÇK-së ka reaguar, pasi janë bërë dy vite që nga arrestimi i ish-komandantit të UÇK-së, Jakup Krasniqi.

Sipas OVL-së, Gjykata Speciale vazhdon shkeljen e të drejtave të njeriut, teksa institucionet e Kosovës po heshtin.

“Të gjithë bashkëluftëtarëve tanë në Hagë u janë shkelur vazhdimisht të drejtat dhe liritë e njeriut, qoftë me mbajtje në paraburgim, qoftë me maltretime të familjarëve të tyre me rastin e komunikimit me ta dhe vizitat ndaj tyre” thuhet në reagimin e OVL-UÇK-së.

Kjo është deklarata e plotë e kësaj organizate:

PseudoGjykata Speciale vazhdon shkeljen e të drejtave më elementare të njeriut, e Institucionet e Kosovës vazhdojnë të heshtin!

Sot u bënë dy vite që nga paraburgosja e Jakup Krasniqit, e dy vite po bëhen edhe për krerët tjerë të ish UÇK-së: Hashim Thaçi, Kadri Veseli e Rexhep Selimi, e nuk ka ende proces gjyqësor, ndërsa absurditeti i PseudoZyrës së Prokurorit të Specializuar është se ende po merret me hetime ndaj tyre;

Kanë kaluar dy vite që kur janë paraburgosur Salih Mustafa, Hysni Gucati e Nasim Haradinaj, e do të bëhen dy vite edhe për Pjetër Shalën, e ZPS, edhe pse për dikë ka përfunduar gjykimi i shkallës së parë, vazhdon ende që të merret me hetime;

Të gjithë bashkëluftëtarëve tanë në Hagë u janë shkelur vazhdimisht të drejtat dhe liritë e njeriut, qoftë me mbajtje në paraburgim, qoftë me maltretime të familjarëve të tyre me rastin e komunikimit me ta dhe vizitat ndaj tyre;

Hysni Gucatit i është përkeqësuar gjendja shëndetësore, e në mëngjesin e sotëm ai i është nënshtruar një operimi të dytë që ishte edhe i komplikuar për të. Edhe përkundër përkeqësimit të gjendjes së Hysni Gucatit, familjes së tij i është pamundësuar nga Gjykata Speciale që ta shohin atë;

Nasim Haradinaj nuk lejohet që ta vizitoj vëllain e tij Agronin, i cili po trajtohet në Gjermani për shkak të sëmundjes së rëndë dhe e ka gjendjen tepër të rënduar shëndetësore;

Për të gjitha këto shkelje dhe padrejtësi që bëhen ndaj bashkëluftëtarëve tanë, Institucionet e Kosovës, por edhe Partitë Politike, vazhdojnë që të heshtin. TURP, përfundon reagimi i tyre. /arbresh.info/