Presidentja e vendit, Vjosa Osmani gjendet në Francë me ftesë të presidentit Emmanuel Macron, ku po merr pjesë në Samitin për Inteligjencën Artificiale.

Osmani ka ndarë disa fotografi nga takimi krah liderëve botërorë, ku ka shkruar se momente si këto forcojnë lidhjet diplomatike e ekonomike dhe hapin mundësi të reja për bashkëpunim.

Presidentja tha se kanë diskutuar tema të rëndësishme në interes të qytetarëve që përfaqësojnë.

“Në prag të Samitit ndërkombëtar për veprim mbi inteligjencën artificiale (AI) ishim të ftuar në darkën e shtruar nga Presidenti Macron në pallatin Élysée, krahas liderëve të tjerë, drejtues të organizatave ndërkombëtare dhe figura të shquara nga sektori privat.
Momente si këto forcojnë lidhjet diplomatike e ekonomike dhe hapin mundësi të reja për bashkëpunim. Së bashku me Presidentin Macron, Zëvendëspresidentin amerikan JD Vance, Kryeministrin indian Narendra Modi, atë kanadez Justin Trudeau, e shumë liderë të tjerë botëror, si dhe liderë të disa prej kompanive më të mëdha botërore si Google, Open AI, Alibaba, etj, kishim mundësi të diskutojmë tema të rëndësishme në interes të qytetarëve që përfaqësojmë”, shkroi Osmani./Arbresh.info/