Presidentja e vendit, Vjosa Osmani ka bërë homazhe në “Kompleksin Memorial Adem Jashari”, në Prekaz, me rastin e festave të 28 Nëntorit.

Në ditëlindjen e heroit Adem Jashari, Osmani tha se kjo ditë e shenjtë për kombin tonë, mori kuptim edhe më të madh me lindjen e kryekomandantit dhe me përkushtimin e palëkundur ndaj idealeve të lirisë dhe pavarësisë kombëtare, shkruan Arbresh.info

E para e vendit tha se Adem Jashari është hero i përjetësisë, njësoj sikurse UÇK-ja e përjetshme!

Postimi i saj:

I lindur më 28 Nëntor, në ditën e Pavarësisë së Shqipërisë dhe ngritjes së flamurit kombëtar në Vlorë, komandanti legjendar Adem Jashari ishte njeriu i destinuar për madhështi. Kjo ditë e shenjtë për kombin tonë, mori kuptim edhe më të madh me lindjen e kryekomandantit dhe me përkushtimin e palëkundur ndaj idealeve të lirisë dhe pavarësisë kombëtare.

Adem Jashari është zemra e luftës sonë, simboli i rezistencës dhe flakadani i përjetshëm i lirisë sonë. Në këtë ditë, kur UÇK-ja doli për herë të parë publikisht, në mesin e qyetarëve të shumtë, nderuam jo vetëm ditën e lindjes së komandantit legjendar, por edhe veprën dhe sakrificën e tij dhe të ushtrisë së cilës i priu edhe idealeve për të cilat dha gjithçka.

Adem Jashari është hero i përjetësisë, njësoj sikurse UÇK-ja e përjetshme!

Ai është i gjallë!