OJQ-të: Qeveria po vazhdon të shkelë ligjin duke politizuar ndërmarrjet publike

Foto: Arsim Namani

14:58 | 11 Nëntor 2015
M. A.

Në një reagim të Instituti INDEP, Instituti GAP dhe GLPS thuhet se Qeveria e Kosovës po vazhdon të shkelë Ligjin për Ndërmarrjet Publike me rastin e zgjedhjes së anëtarëve të bordeve të këtyre ndërmarrjeve.

OJQ-të shprehin edhe njëherë shqetësimin e tyre në lidhje me këto vendime politike dhe të paligjshme dhe i kërkojmë Qeverisë së Kosovës që të rishikojë menjëherë dhe të shfuqizojë këto vendime.

“Kjo u vërtetua edhe në mbledhjen e 54-të të Qeverisë, në të cilën u shtua edhe më tej lista e të emëruarve politik në bordet e ndërmarrjeve publike. Këto vendime janë shqetësuese për institutet tona dhe janë reflektuar si të tilla edhe në Raportin e Progresit”, thuhet në reagim.

Kjo vlen veçanërisht për pozitat e larta në shërbimin civil dhe emërimet në bordet e entiteteve publike, në të cilat influenca politike gjatë emërimeve është shqetësuese.