Ministria e Bujqësisë, Pylltarisë dhe Zhvillimit Rural gjegjësisht autoriteti vartës Agjencia e Ushqimit dhe Veterinarisë, nga data 1 Nëntor nuk është përgjegjëse për mbikëqyrjen e zbatimit të Ligjit të Duhanit.

Kështu tha për Arbresh.info, zëdhënësi i Agjencisë së Ushqimit dhe Veterinarisë, Lamir Thaçi, i cili tha se Ministria e Bujqësisë dhe ajo e Shëndetësisë kanë nënshkruar Memorandum Mirëkuptimi për transferimin e Inspektorëve Sanitar nga AUV-MBPZHR në MSH.

“Me hyrje në fuqi të LIGJIT NR.08/L-067 PËR INSPEKTIMET, është përcaktuar edhe organizim i ri inspektorateve në kuadër të institucioneve shtetërore. Andaj në zbatim të kësaj, Ministria e Shëndetësisë dhe Ministria e Bujqësisë Pylltarisë dhe Zhvillimit Rural me datë 12.10.2023 kanë nënshkruar Memorandum Mirëkuptimi për transferimin e Inspektorëve Sanitar nga AUV-MBPZHR në MSH.”, ka thënë Thaçi.

Sipas tij, numri i inspektorëve sanitar të transferuar është 57.

Inspektorët Sanitarë kanë nisur punën si inspektor të MSH-së që nga 1 nëntori.

“Po ashtu edhe vetë Ligji Nr. 2003/22 për Inspektoratin Sanitar të Kosovës, me nenin 2 parasheh qe ky inspektorat, organizohet (funksionin) në kuadër të Ministrisë së Shëndetësisë.”, tha zëdhënësi i AUV-it./Arbresh.info/