Policia e Kosovës me rekomandimin e Inspektoratit Policor të Kosovës (IPK) ka suspenduar dy zyrtarë policorë.

Ndërkaq, IPK-ja ka suspenduar një zyrtar policor, shkruan Arbresh.info.

Sipas njoftimit, të suspenduar janë një kolonel, një major dhe një rreshter policor.

Policia bën të ditur se suspendimi i zyrtarëve policorë është bërë mbi dyshimin për pjesëmarrje në tubim apo aktivitet të natyrës politike, të cilat bien në kundërshtim me procedurat ligjore si dhe udhëzimet e brendshme të PK-së.

“Policia e Kosovës, si institucion i zbatimit të ligjit, mbetet e përkushtuar në realizimin e detyrave dhe autorizimeve ligjore e kushtetuese, si institucioni kyç për garantimin e rendit dhe sigurisë për të gjithë qytetarët pa dallim.”, thuhet në njoftimin e policisë.

“Me qëllim të ruajtjes së besimit të publikut, ruajtjes së imazhit të Policisë si një ndër institucionet më të besuara dhe transparente, Policia e Kosovës mbetet e përkushtuar në ruajtjen e vlerave, integritetit dhe profesionalizmit të saj, duke shërbyer në mënyrë të drejtë dhe të paanshme.”, thuhet tutje.

“Policia e Kosovës me gjithë zyrtarët saj, kanë detyrë primare garantimin e rendit dhe sigurisë për të gjithë qytetarët dhe çdo përfshirje e zyrtarëve policorë në aktivitete politike mund të dëmtojë besimin e krijuar ndër vite ndaj Policisë së Kosovës.”, bën të ditur PK-ja./Arbresh.info/

LEXO EDHE:

Morën pjesë në tubime politike – IPK rekomandon suspendimin e kolonelit, majorin e qon në trajtim disiplinor