Posa të marrë lajm nga koalicioni PDK-AAK-Nisma se i kanë numrat për ta votuar kryetarin e Kuvendit të Kosovës, kryesuesi i Kuvendit, Adem Mikullovci do e thërrasë seancën e radhës.

Në një prononcim për Indeksonline, Mikullovci ka thënë se nuk do të ketë konsultime me Grupet Parlamentare, meqë sipas tij kjo nuk është e nevojshme nëse PAN deklaron se i ka numrat.

“Ata ende nuk kanë paraqitur kërkesë për me e mbajtë seancën. Me ta nuk kam çka të konsultohem, sepse ata thonë se i kanë numrat dhe kërkojnë të caktohet seanca. Unë vetëm i pyes se kur po donë”, është shprehur ai.

Mikullovci ka thënë se konsultime do të ketë me LDK-në dhe Vetëvendosjen. Deri sa, ai është shprehur se meqë PAN do të deklarojë se i ka numrat, atëherë seanca do të zhvillohet sipas numrave.

“Unë e thërras drejtpërdrejtë seancën. Normal që konsultohem me LDK-në dhe Vetëvendosjen që kanë qenë të rregullt. Tani duhet të jenë krejt në rregull, sipas normave. I kanë numrat, thirret seanca, zgjidhet kryetari, nuk po shoh aty ndonjë kryeneçësi”, ka thënë Mikullovci.

Ndryshe, koalicioni PAN dje ka nënshkruar marrëveshje me AKR-në e Behgjet Pacollit larg mediave dhe qytetarit. E pranishme në këtë marrëveshje “historike” ishte vetëm një media e afërt me AKR-në ndërsa të tjerat nuk u informuan.