Ministri i Mbrojtjes, Ejup Maqedonci ka bër homazhe tek varri i heroit Zahir Pajaziti, me rastin e ditëlindjes së tij.

Maqedonci përmes një postimi në Facebook, shkruan se me veprën e tij patriotike ai u bë i gjithë hapësirës shqiptare.

“Data 1 nëntor është ditëlindja e Zahir Pajazitit, shpirtit të guerilës shqiptare për çlirimin e Kosovës. Zahiri ka lindur në ditën e parë të nëntorit të vitit 1962, në Turiçicë të Gollakut, por me veprën e tij patriotike ai u bë i gjithë hapësirës shqiptare”, shkruan Ministri.

Tutje, ai shkruan se Pajaziti besonte që lufta për çlirim duhej të shtrihej në tërë Kosovën.

“U lind në Gollak dhe u rrit mes traditave të Llapit. U shkollua në Vushtrri dhe në Prishtinë, ndërsa u stërvit dhe u strehua në Tiranë. Mbajti lidhje e kontakte me Drenicë e Dukagjin, kurse u shoqërua me shokë edhe nga Pollogu. Organizoi dhe kreu aksione në çdo zonë të Kosovës, sepse ai besonte që lufta për çlirim duhej të shtrihej në tërë Kosovën”, shkruan Maqedonci./Arbresh.info/