Një ditë pasi Gjykata Kushtetuese e Kosovës ka shpallur kushtetues Ligjin për Ndryshimin dhe Plotësimin e Ligjit për Këshillin Prokurorial, ministrja në detyrë e Drejtësisë, Albulena Haxhiu, përmes një video-adresimi ka thënë se përmes përbërjes së balancuar do të eliminohet korporatizmi brenda KPK-së. Ndërsa, nga shoqëria civile thonë se ligji do të hyjë në fuqi pas dekretimit nga Presidentja.

Gjykata Kushtetuese ka dhënë dritën e gjelbër për Ligjin për Këshillin Prokurorial. Përmes një videoje, ministrja në detyrë e Drejtësisë, Albulena Haxhiu, ka thënë se përmes këtij ligji, KPK nuk do t’i ketë më 13 anëtarë, por 7: Kryeprokurorin, sipas detyrës zyrtare, 3 prokurorë dhe 3 joprokurorë, të zgjedhur nga Kuvendi.

“Parashihen dispozita për eliminimin e konfliktit të interesit; forcohen kritere për depolitizim të anëtarëve të Këshillit dhe eliminim të korporatizmit. Sa i përket vendimmarrjes në përbërje të rregullt prej 7 anëtarësh, kuorumi do të jetë prej 5 anëtarësh. Me këto ndryshime, Këshilli, me përbërje të re dhe të balancuar, është caktuar si organi i vetëm, i cili mund të transferojë prokurorët nga një Prokurori në një Prokurori tjetër, rrjedhimisht kjo kompetencë i është hequr Kryeprokurorit. Gjithashtu, është rregulluar procesi i përzgjedhjes së anëtarëve prokurorë dhe është rritur transparenca në këtë drejtim. Është rregulluar vendimi i publikimeve të Këshillit dhe aspekte të tjera që ndërlidhen me ngritjen e transparencës,” tha Haxhiu.

Ky ligj fillimisht duhet të dorëzohet te presidentja për dekretim, thotë Astrit Kolaj nga Instituti i Kosovës për Drejtësi. Sipas tij, nëse ky ligj aplikohet me përmbajtjen aktuale në praktikë, do të mbarojë kultura e pandëshkueshmërisë, ndërsa, i pyetur se sa do të hapë rrugë për zgjedhjen e kryeprokurorit të shtetit, Kolaj tha se ky ligj nuk ka qenë pengesë për këtë çështje.

“Pengesë për moszgjedhjen e kryeprokurorit të shtetit është Këshilli Prokurorial, që nuk ka hapur rrugë për zgjidhjen e kësaj çështjeje. Ky proces është përcjellë nga IKD dhe organizata të tjera që kemi kërkuar,” tha Kolaj.

Gjykata, në aktgjykimin e saj, konstatoi se ndryshimet që lidhen me përkufizimin e “integritetit profesional”, kushtin për mospasjen e aktakuzës, përbërjen e Komisionit të Posaçëm dhe kuorumin e vendimmarrjes nuk bien në kundërshtim me Kushtetutën. Vendimi u mbështet në opinionin e Komisionit të Venedikut dhe në aktgjykimet e mëparshme të Kushtetueses.