Franca nuk ka bërë kushtëzime ndaj Kosovës për liberalizimin e vizave.

Kështu thotë kryetarja e Komisionit për Integrime Evropiane në Kuvendin e Kosovës, Rrezarta Krasniqi.

Në një deklarim për arbresh.info, ajo tha se pretendimet se francezët patën kushte, nuk qëndrojnë.

“Konstatimet se Franca ka kushtëzuar procesin e liberalizimit të vizave nuk qëndrojnë, ngaqë ajo që u pa dhe u raportua në media kishte të bënte me tepër me një proces teknik për qytetarët e vendit tonë që duan të lëvizin në vendet e BE-së, me qëllim të identifikimit të tyre. Ky pra është roli i ETIAS, një sistem krejtësisht elektronik, që mundëson marrjen e informacioneve për banorët e vendeve që nuk kanë nevojë për viza e për të hyrë në Zonën Schengen”, u shpreh Krasniqi.

Deputetja e LDK-së thotë se aktualisht është një klimë pozitive për sa i përket çështjes së liberalizimit të vizave për Kosovën dhe sipas saj, të enjten edhe njëherë u konfirmua se janë plotësuar të gjitha kriteret e përcaktuar për lëvizje të lirë.

Megjithatë, ajo shton se Institucionet duhet të vazhdojnë të lobojnë për liberalizimin e  vizave.

“Interpretimet kanë qenë të ndryshme, por në këtë fazë ajo që kërkohet dhe duhet të bëjnë institucionet me kujdes dhe maturi, është dinamizmi i angazhimit në lobimin tek vendet anëtare të BE. Ky është një shans historik për vendin që padrejtësia të marrë fund ndaj popullit me pro-perëndimor në Ballkan’.

Mirëpo, njohësi i çështjes së marrëdhënieve ndërkombëtare politike, Shkodran Ramadani thotë se Kosova i ka përmbushë qysh moti kriteret për liberalizim vizash.

“Kosova i pati përmbushur të gjitha kriteret për liberalizimin e vizave, por për fat të keq, ajo u bë vendi i parë në historinë e liberalizimit të vizave që përmbushë të gjitha kushtet dhe nuk e fiton liberalizimin. Kosovës iu bë një padrejtësi e madhe dhe një diskriminim i rëndë, duke e izoluar atë nga popujt tjerë, ani pse kishte plotësuar shumë kushte me shumë se ata” ka thënë Ramadani.

Po ashtu, Ramadani ka kritikuar Ministrinë e Punëve të Jashtme, duke thënë se nuk kanë bërë sa duhet.

‘E sot, pas gjithë kësaj, ministrja e Jashtme del e thotë pafytyrësisht se “sot u konfirmua që Kosova ka përmbushur të gjitha kushtet për liberalizim të vizave”. Flet sikur këto veprime të kenë ndodhur para një shekulli e jo para 4-5 viteve’, deklaroi Ramadani.

Ndryshe, më 13 tetor është mbajtur takimi i grupit punues të Këshillit të Bashkimit Evropian, ku është diskutuar për liberalizimin e vizave për Kosovën.

Ndërsa takimi tjetër pritet të mbahet më 9 nëntor./arbresh.info/Vjollca Gajraku/