Lidhja Demokratike e Kosovës (LDK) ka reaguar pas takimit trepalësh të mbajtur sot në Bruksel mes zëvendëskryeministrit në detyrë Besnik Bislimi, kryenegociatorit serb Petkoviç dhe emisarit të Bashkimit Evropian për dialogun Kosovë-Serbi, Peter Sorensen.

LDK ka deklaruar se Bislimi nuk ka asnjë mandat legjitim për të përfaqësuar Republikën e Kosovës në këtë proces, duke theksuar se mandati i ish-qeverisë ka përfunduar pas certifikimit të rezultateve të zgjedhjeve të 9 shkurtit 2025.

“Z. Bislimi është vetëm ushtrues detyre, pa legjitimitet demokratik dhe pa miratim parlamentar për të marrë vendime në procesin e dialogut. Çdo angazhim apo marrëveshje eventuale nga kjo qeveri në detyrë nuk mund të ketë efekt juridik për shtetin e Kosovës,” thuhet në reagimin zyrtar të LDK-së.

Sipas partisë opozitare, negociatat me Serbinë janë çështje të interesit të lartë shtetëror dhe nuk mund të zhvillohen nga një qeveri pa mandat të ri e të freskët demokratik.

LDK e konsideron pjesëmarrjen e Bislimit në dialog si të “papranueshme, antikushtetuese dhe joligjore.”

LDK i bën thirrje institucioneve vendore dhe ndërkombëtare që të respektojnë rendin kushtetues dhe vullnetin e qytetarëve të shprehur në zgjedhjet e fundit. Sipas saj, dialogu duhet të vazhdojë vetëm me institucione të reja, të dala nga zgjedhjet, me përfaqësim të plotë dhe mandat të qartë politik./Arbresh.info

LEXO EDHE:

Takimi i kryenegociatorëve në Bruksel, Bislimi: Sorensen ka vizion të qartë si të ecet përpara në takimet e radhës

Sorensen deklarohet pas takimit me Bislimin e Petkoviqin, paralajmëron takim të nivelit të lartë