Kryeministri në detyrë i Kosovës, Albin Kurti, ka marrë pjesë në Akademinë Përkujtimore për 27-vjetorin e Masakrës së Reçakut, ku ka kujtuar 45 civilët shqiptarë të vrarë nga forcat serbe më 15 janar 1999.

Në fjalën e tij, Kurti tha se mbledhja në Reçak është një obligim ndaj kujtesës dhe së vërtetës, duke theksuar se dhimbja e familjarëve të viktimave mbetet dhimbje e të gjithë qytetarëve të Kosovës.

“Jemi mbledhur në Reçak për kujtimin e 45 të vrarëve në vitin 1999. Ne u përkulemi me respekt të thellë dhembjes suaj, sepse dhembja juaj është dhembja jonë. Krimet e kryera në Reçak nuk mund të fshihen nga shteti gjenocidal i Serbisë,” ka deklaruar Kurti.
Ai theksoi se institucionet e Kosovës kanë ndërmarrë hapa konkretë në përmbushje të obligimit për drejtësi, duke përmendur ndërtimin e kornizës ligjore për gjykimin në mungesë.

Gjatë fjalimit, kryeministri në detyrë përkujtoi edhe komandantin e UÇK-së, Ahmed Kaçiku, i cili, sipas tij, sot do të kishte mbushur 62 vjeç.
Po ashtu, Kurti shprehu mirënjohje të veçantë për ish-ambasadorin dhe shefin e Misionit Verifikues të OSBE-së, William Walker, duke theksuar rolin e tij vendimtar në zbardhjen e së vërtetës për masakrën.

“I nderuar ambasador Walker, ju keni një vend të rëndësishëm në zemrat tona. Ju vendosët të vini vetë në Reçak dhe të dëshmoni të vërtetën. Qeveria e Kosovës e ka mbështetur librin tuaj me mirënjohje të thellë dhe ju jemi falënderues,” u shpreh Kurti.

Në fund, ai theksoi se Kosova e sotme është shtet i pavarur dhe i sigurt, me stabilitet institucional dhe ekonomi në rritje, duke nënvizuar se liria e gëzuar sot është fryt i angazhimit të përbashkët.

“Republika e Kosovës riafirmon angazhimin e përhershëm për paqe të qëndrueshme,” përfundoi Kurti./Arbresh.info