Komuna e Prishtinës ia ka dhënë Bashkësisë Islame të Kosovës kushtet e ndërtimit për Xhaminë Qendrore në kryeqytet.

Lajmin e ka bërë të ditur vetë BIK, nëpërmjet një njoftimi, të publikuar në ueb-sajtin e tij zyrtar, të cilit i ka bashkëngjitur edhe dokumentet e pranuara nga Komuna.

BIK po ashtu ka njoftuar se tashmë është duke punuar në përgatitjen e projektit kryesor dhe të gjithë dokumentacionit të nevojshëm, që, siç ka thënë ai, sa më parë të nisin punimet për ndërtimin e xhamisë.

“Në interesim të opinionit të gjerë dhe të besimtarëve tanë përkitazi me procedurën për përgatitjet rreth nisjes së ndërtimit të Xhamisë Qendrore në Prishtinë, Kryesia e BIRK-ut njofton opinion se ditë më parë nga Komuna e Prishtinës, respektivisht nga Drejtoria e Urbanizmit, ka marrë kushtet ndërtimore për hartimin e dokumentacionit ndërtimor- projektin kryesor për ndërtimin e Kompleksit “Xhamia Qendrore” në Prishtinë”, thuhet në njoftim.

“Ekipi i arkitektëve të Kryesisë së BIRK-ut në bashkëpunim me Studion Projektuese nga Ankaraja janë duke punuar në përgatitjen e projektit kryesor dhe gjithë dokumentacionit të nevojshëm, në përputhje me planin ideor dhe kushtet e ndërtimit, që sa më parë të krijohen kushtet për nisjen e punimeve në ndërtimin e Kompleksit të “Xhamisë Qendrore” në Prishtinë”, thekson njoftimi i BIK’ut.