Këshilli i Specializantëve po proteston sot para Ministrisë së Shëndetësisë, për mos marrjen e subvencioneve të parapara për ta.

Në një kërkesë të dërguar brenda MSh-së, e përbërë nga katër pika kryesore, po presin që të kenë përgjigje pozitive dhe të mos mbesin rrugëve ashtu siç edhe kanë shkruar në disa pankarta, raporton arbresh.info.

Arianit Zajmi, kryetari i Këshillit të Specializantëve para mediave tha se sot ata u detyruan në temperatura të ulëta të protestojnë për të kërkuar të drejtat e tyre elementare që u janë mohuar tash e një vit.

“Sot ne specializantët përfaqësues të të gjitha klinikave jemi mbledh për me protestua para Ministrisë së Shëndetësisë edhe në njëfarë forme jemi ka e sfidojmë edhe të ftohtin edhe temperatura e ulta që po mbretërojnë tani, për shkak që jemi të detyruam me protestua rrugëve për të drejtat dhe kushtet tona elementare të jetesës të cilat nuk po plotësohen tash e një vit pothuajse janë bërë dhe këto kushte për të cilat ne po luftojmë për mu plotësua qe një vjet e mund të realizohen brenda një periudhë një ditore ose dy ditore mirëpo po them ashtu po mungon ai vullneti politik për me i realizua kërkesat tona elementare dhe me një farë forme po tentohet që buxheti i shtetit dhe para publike me u kursye në kurriz të specializantëve dhe mjekëve të ri të njëjtën kohë”, tha Zajmi.

Ndërkaq tutje ai përmendi edhe nëntë specializantë nga Maqedonia, Mali i Zi, dhe Shqipëria që tash e një vit ata nuk marrin pagë pavarësisht se janë me kontratë të rregullt.

“Ne i kemi edhe nëntë specializantë të cilët janë nga Maqedonia, Mali i Zi dhe Shqipëria të cilët që nga momenti që i kanë nënshkrua kontratat pra kanë kalua më shumë se një gjysmë viti këta nuk e marrin asnjë cent ne gjithë jemi pro kauzës së bashkimit kombëtarë mirëpo po mendoj që ma i rëndësishëm se bashkimi kombëtarë ose një hap shumë i rëndësishëm drejt bashkimit kombëtarë do të ishte që këta specializantë ta fitonin të drejtën e një pagese sepse në fund të fundit këta specializantë të cilët janë nëntë dhe janë një numër shumë i vogël mirëpo të njëjtën kohë këta janë edhe bartës të familjeve të tyre dhe para se gjithash këta janë edhe doktorë edhe un mendojë që e meritojnë me u trajtua këtë mënyrë nga shteti jonë”, tha Zajmi.

“Specializantët që 1 vit në rrugë”, “vlerësoni mjekët” ishin disa nga mbishkrimet që u vendosën në hyrje të këtij dikasteri.

Me pankarta në duar, specializant nga Kosova, Shqipëria, Maqedonia, Mali i Zi, Presheva kanë dalur t’i thonë jo “ikjes së trurit, duke kërkuar të respektohen të drejtat e tyre./arbresh.info/

/