Një biznes i madh në Kosovë ka ngritur shqetësim serioz lidhur me mungesën e furnizimit të mjaftueshëm me energji elektrike, duke paralajmëruar se investimi i planifikuar dhe hapja e qindra vendeve të reja të punës mund të dështojnë.

Pronari i këtij biznesi i është drejtuar kompanisë KEDS me kërkesë për rritje të kapacitetit energjetik, mirëpo sipas dokumentit që ka siguruar redaksia jonë, përgjigjja ka qenë negative në pjesën kryesore të kërkesës.

Në arsyetimin e saj, KEDS thekson se rrjeti ekzistues në zonë është i mbingarkuar dhe nuk mund të përballojë ngarkesë shtesë. Sipas tyre, kufizimet teknike në daljet 10(20) kV e bëjnë të pamundur rritjen e kapacitetit në këtë fazë.

Si alternativë, kompania ka sugjeruar përmirësimin e infrastrukturës ekzistuese energjetike. Por ajo që e bën edhe më të rëndë situatën për investitorin është fakti se atij i është kërkuar që vetë të mbulojë kostot për rregullimin e linjave, pavarësisht se zgjerimi i rrjetit konsiderohet përgjegjësi e operatorit të shpërndarjes.

Kjo ka shkaktuar pakënaqësi të madhe te pronari i biznesit, i cili e sheh këtë si një barrë të padrejtë financiare dhe një pengesë serioze për zhvillimin e aktivitetit të tij.

Sipas burimeve tona, ky investim ka potencial të punësojë mbi 200 punëtor, por pa një zgjidhje të shpejtë për furnizimin me energji, realizimi i tij mbetet në pikëpyetje./Arbresh.info/