Javën e ardhshme do të dërgohet në Zvicër lënda e përkthyer për hetim për rastin e vdekjes së aktivistit të Vetëvendosjes, Astrit Dehari.

Këtë e ka bërë të ditur Ministri i Drejtësisë, Abelard Tahiri në seancën e sotme kur u pyet nga deputeti Sami Kurteshi, raporton Arbresh.info.

“Në këtë javë ka përfunduar përkthimi i lëndës, ka vënë një lëndë vuluminoze me një material 3000 faqe, në këtë javë ka përfunduar përkthimi i saj. Jam i informuar nga Prokuroria e Shtetit që javën që vjen, nga e hëna, lënda do të dërgohet përmes atasheut policor të Ambasadës së Zvicrës që është në Kosovë drejt institutit në fjalë. MD nuk është ndërlidhëse në këtë rast, është direkt prokurori i rastit përmes prokurorisë së shtetit dhe atasheut policor, në këtë rast Ambasadës së Zvicrës. Nga java e ardhshme e tutje rasti do të bartet konform marrëveshjes që është arritur mes prokurorisë së shtetit dhe institutit në fjalë. Pra deri tani ka qenë në fazën e përkthimeve, nga java e ardhshme do t’i shkojë Institutit në Zvicër për hetim”, ka thënë Tahiri.

Sami Kurteshi i bëri pyetje ministrit të drejtësisë, Abelard Tahiri lidhur me mbulimin e shpenzimeve për një hetim ndërkombëtar për rastin Dehari./Arbresh.info