Disa objekte ushtarake janë bombarduar në Iran. Izraeli deklaron se ka vrarë një numër të madh njerëzish nga Garda Revolucionare Iraniane.

“Forcat e Mbrojtjes të Izraelit, IDF, po kryen aktualisht sulme me forcë të paparë”, thotë ministri i Mbrojtjes, Israel Katz.

Irani sulmoi Izraelin këtë mëngjes. Disa nga raketat e Iranit raportohet se kanë goditur të paktën pesë qytete të ndryshme në Izrael.

Menjëherë pas kësaj, Izraeli u përgjigj me sulme të reja ndaj Iranit. Në një deklaratë, Izraeli thotë se po e sulmon Iranin me “forcë të paparë”.

“IDF aktualisht po kryen sulme me forcë të paparë kundër objektivave dhe trupave të lidhura me regjimin”, thotë Ministri Izraelit i Mbrojtjes, Israel Katz, raportojnë mediat e huaja.

Sulm ndaj Gardës Revolucionare Iraniane

Tani ka raportime për shpërthime të fuqishme në disa vende në Teheran.

IDF deklaron se sulmet kanë goditur një seli që i përket Trupave të Gardës Revolucionare Islamike të Iranit, shkruan Times of Israel. Raportohet se disa persona kanë vdekur.

Sulmohet burgu dhe selia e policisë në Evin

Ndër të tjera, raportohet se është goditur hyrja e burgut famëkeq Evin. Ndër të tjerë, aty është i burgosur edhe studiuesi suedezo-iranian Ahmedreza Djalali.

Izraeli ka sulmuar gjithashtu rrugët që të çojnë në uzinën bërthamore të Fordos.

I njëjti objekt u sulmua nga SHBA-të gjatë natës të së dielës. Pastaj Donald Trump tha se SHBA-të e kishin “fshirë atë”.

Objektiva të tjerë që thuhet se Izraeli ka goditur përfshijnë agjenci të ndryshme policore, siç është selia e inteligjencës së policisë iraniane.

Shkatërroi “orën e fundit të botës”

Ministri izraelit i Mbrojtjes, Israel Katz, thotë se ata kanë shkatërruar gjithashtu të ashtuquajturën “ora e fundit të botës” të Iranit.

Ora u ngrit në qendër të Teheranit në vitin 2017 dhe numëron mbrapsht deri në vitin 2040 – viti kur shteti izraelit do të pushojë së ekzistuari, sipas regjimit iranian.

Takimi me Putinin

Në të njëjtën kohë, në Moskë u zhvillua takimi midis ministrit të Jashtëm iranian, Abbas Araghchi, dhe presidentit rus, Vladimir Putin.

Rusia thotë se është e gatshme të ndihmojë Iranin, raporton AP.

“E gjitha varet nga ajo që i nevojitet Iranit. Ne kemi ofruar përpjekjet tona për ndërmjetësim. Kjo është konkrete”, tha zëdhënësi i Kremlinit, Dmitry Peskov.

Gjatë takimit, Vladimir Putin tha se sulmet ndaj Iranit janë “të pabaza” dhe nuk mund të justifikohen./rtk