Imam Labinot Maliqi është mirëpritur nga Ambasadori Britanik, Nicholas Abbott, në Ambasadën e Mbretërisë së Bashkuar në Prishtinë dhe ka shkruar në librin e zisë me rastin e vdekjes së Mbretëreshës Elizabeth ll.

“Sot, isha i nderuar të mirëpritem nga Ambasadori Britanik, Shkëlqesia e tij, Nicholas Abbott, si dhe nënshkrova Librin e Zisë në Ambasadën e Mbretërisë së Bashkuar në Prishtinë, duke shprehur ngushëllimet më të thella për ndarjen nga jeta e Mbretëreshës së ndjerë, Elizabeth II, mbretërimi i së cilës ishte i rëndësishëm dhe historik. Ajo ishte një ikonë e stabilitetit dhe një fener morali në shërbim të popullit të saj, e cila mishëroi vazhdimësinë dhe unitetin e Kombit Britanik për më shumë se 70 vjet”, tha Maliqi.

Përmes një postimi në rrjetin social Facebook, Maliqi i uroj edhe Mbretit Charles lll marrjen e detyrës.

“Shëndet e bekime për Mbretin Charles III, i cili është një mik i popullit të Kosovës dhe një mbështetës i madh i bashkëjetesës ndërfetare, për popullin e Mbretërisë së Bashkuar si dhe për njerëzit e Komonuelthit”, ka shkruar Imam Maliqi./arbresh.info/