Anëtarja e Kryesisë së Lëvizjes Vetëvendosje Albulena Haxhiu, i ka reaguar kryetarit të Lidhjes Demokratike të Kosovës Isa Mustafa, lidhur me letrën që ky i fundit e publikoi lidhur me Asociacionin e Komunave me shumicë serbe.

Haxhiu tha se edhe kësaj radhe një kryeministër i Kosovës garancën e interesit dhe integritetit të Republikës ia paska pas deleguar një pale të tretë, në këtë rast fasilituesit, shkruan kk.

Reagimi i plotë:

Letra e znj. Mogherini e datës 24 gusht si garancë për marrëveshjen e 25 gushtit mund të ketë vlejtë maksimumi deri më datën 23 dhjetor 2015, atëherë kur Gjykata Kushtetuese e Republikës së Kosovës, institucioni i vetëm dhe suprem për interpretime kushtetuese, e shpalli garancën e znj. Mogherini të pavlerë e marrëveshjen në kundërshtim me Kushtetutën e vendit.

Përtej kësaj, këtu ka një shpërfaqje të një problemi tejet serioz e të kushtueshëm që i ka përcjellë delegacionet e Kosovës që nga hera. Edhe asaj radhe, një kryeministër i Republikës së Kosovës, garancën e interesit dhe integritetit të Republikës ia paska pas deleguar një pale të tretë, në këtë rast fasilituesit.