Haradinaj: Për sa kohë i dukem i rrezikshëm Vuçiqit e Serbisë, jemi në rrugë të drejtë

15:06 | 19 Janar 2021
Arbresh.info

Kandidati për president të Kosovës, Ramush Haradinaj ka thënë se për sa kohë i dukem i rrezikshëm Aleksandër Vuçiqit dhe Serbisë, Kosova është në rrugë të drejtë.

Po ashtu, përmes një postimi në Facebook, Haradinaj i është drejtuar presidentit serb duke i thënë se nuk ka nevojë që të ketë frikë, pasi Kosova po e kërkon vetëm atë që i takon, shkruan arbresh.info

Tutje ai ka shtuar se Kosova dhe qytetarët e saj janë më pro-perëndimorët dhe si të tillë nuk e meritojnë të përbuzen, injorohen dhe kushtëzohen në pafundësi./arbresh.info/

Postimi i plotë i Haradinajt:

Për sa kohë i dukem i rrezikshëm Aleksandër Vuçiqit dhe Serbisë, jemi në rrugë të drejtë!

Mos keni frikë, z. Vuçiq. Nuk keni nevojë të jeni nervoz. Kosova vetëm po e kërkon atë që i takon.

Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur.

Tutje, Kosova e di rrugën e saj drejt anëtarësimit në NATO, BE dhe OKB. Me retorikë histerike nuk do të na ndaloni në të drejten tonë për të definuar të ardhmen e Kosovës.

Të gjithë duhet ta dinë që deklarata dhe betimi im për bashkim me Shqipërinë vjen si rezultat i neglizhencës së vazhdueshme të Brukselit në lidhje me Kosovën. Kosova dhe qytetarët e saj janë më pro-perëndimorët dhe si të tillë nuk e meritojnë të përbuzen, injorohen dhe kushtëzohen në pafundësi!