Ka filluar zhvarrimi i mbi 2 mijë mbetjeve mortore të kohës së luftës së fundit për shkak së ato janë varrosur pa iu bërë testi i ADN-së.

Në mungesë të tij shumë familje kosovare kanë ngatërruar kufomat e të afërmve të tyre që janë vrarë gjatë luftës së vitit 1998-99.

Kryesisht mbetjet mortore të ardhura nga Serbia, janë në proces të zhvarrimit dhe verifikimit sepse janë varrosur pa testin e ADN-së.

Prenk Gjetaj nga Komisioni për persona të pagjetur ka thënë për Indeksonline se procesi i zhvarrimit të viktimave të luftës së fundit ka filluar dhe do të vazhdoj gjatë tërë vitit.

“Tre varre sot janë hapur për shkak se disa pjesë kockore janë gjet që i takojnë atij trupi që ishte i varrosur ndërsa duhet hequr pjesët që nuk i takojnë. Në bazë të analizës bëhet ribashkimi i pjesëve kockore që deri me tani kanë qenë të ndara”,ka thënë Gjetaj.

Në procesin e verifikimit të mbetjeve mortore sipas Gjetajt do të punohet gjatë tërë këtij viti dhe do të ketë ndërprerje vetëm atëherë kur kushtet atmosferike nuk lejojnë.

“Pas luftës metoda e identifikimit të mbetjeve mortore ka qenë përmes shenjave, teshave apo ndonjë identifikimi specifik, por të gjitha këto identifikime kanë dal se janë bërë gabimisht. Testet e para kanë treguar që ka gabime, në Mitrovicë ka dalë se është një përqindje e lartë diku rreth 17 për qind të mbetjeve mortore janë identifikuar gabimisht. Kjo tregon se edhe në vende tjera të Kosovës, janë bërë gabime të njëjta e që duhet të përmirësohen me anë të testit të ADN-së”, ka thënë Gjetaj.