Ka vdekur zjarrfikësi që ishte lënduar në aksidentin e rëndë mes një kamionete dhe kamioni të zjarrfikësve sot gjatë ditës në Gjakovë.

Vdes zjarrfikësi i përfshirë në aksidentin mes dy kamionëve në Gjakovë

Bëhet e ditur se ai është Kaqun Lima, shefi i Operativës së Zjarrfikësve të Brigadës së Gjakovës.

Lajmin e ka bërë të ditur Tahir Ahmeti, njohës i çështjeve të emergjencave, me anë të një shkrimi në ‘Facebook’.

“Me keqardhje u informuam për ndarjen nga jeta të Kaqun Limës, shefit të Operativës në Brigadën e Zjarrfikësve të Gjakovës. Ai u aksidentua sot rreth orës 15:30 në Mejë, ndërsa ishte në krye të detyrës, dhe ndërroi jetë në QKUK në Prishtinë“, ka shkruar ai.

“Lajmin e kanë konfirmuar Brigada e Zjarrfikësve në Gjakovë dhe Drejtoria Rajonale e Policisë në Gjakovë“.

Rastin për Arbresh.info e ka konfirmuar dhe zëdhënësja e policisë së Kosovës për rajonin e Gjakovës, Vlera Krasniqi.

“Sapo na njoftuan se zjarrfikësi i lënduar në aksident mes dy automjeteve ka ndërruar jetë”, ka thënë Krasniqi.

Ajo ka treguar se rasti është duke u trajtuar nga njësitet përkatëse të Policisë, të cilët kanë dalë menjëherë në vendin e ngjarjes dhe po merren me zbardhjen e plotë të rrethanave të aksidentit. /Arbresh.info